| Text |
Ich Bernt van der Leyen, Frederich van dem Kaldenhove ind Lyse, syne echte Husfrowe, des vorgenanten Berndes echte moider, doent kunt ind bekennen vur uns ind vur unse erven, dat wy myt vreyen wyllen ind voirbedachten raide dairop gehadt anderen ind mereren unsen schaden to verhoiden ind umb eyne merclyge summe geltz, die unß to unserm willen ind genoige waill ind lessligen betalt, rechtligen ind redeligen eyns steden vasten vulmechtigen erffkoips ten ewygen dagen sunder wiederkoip hebn verkofft ind verkoipen in cracht dyss brieffs den ersamen ind geistligen heren Hinrich Hugenpoet pater, suster Elsken Sundes, moider, ind den sementligen susteren des conventz Marienborn to Lutkendorpmonde, eren nakomelingen ind eynen helder dyss brieffs myt erem weten ind wyllen unse guet, gelegen to Tospell indem kerspell van Lutkendorpmonde ind ampte van Boichem, geheiten die Baidenhove, nu genant dat Overguet toe Tospell, myt alle synen alden ind nyen rechten gewonten ind vryheiden in Tospeler, oversche Stockemer marcke ind anderen holdgewelte, woe dat vurgenant guet vort ind wair dat gelegen is an torve, an twige, an holte, an velde, an water, an weyden, an dyken, myt aller slachter nut ind allem rechten, myt allen recht dair van utgescheiden; ind wy Bernt, Friederich ind Lyse, elude vurgenante, synt ind hebn dieses vurgenomten guedes vur unß ind unse erven rechtligen uthgegayn ind rechte oplatynge ind vertichnisse gedayn myt hande ind gichtyggen monde as recht is, to nutte ind behoiff des vorgenanten pater, moider ind conventz off heldes vurgemelder, ere beste dair nu vortmener myt to doyn nae erem willen; alsoe dat wy, Bernt, Frederich ind Lyse vurgeroirt ind alle unse erven dair nu voirt an van deger ind all ontervet ind dat vurgenante convent ere nakomelinge off helder vurgenant daire eweligen myt wieder beervet sullen syn ton ewygen dagen ind tyden to wenden, to keren, to gebruken ind des sich nae allem nutte ind oirber to maken, to laiten ind to doyen ene bequemest is; oich bekennen wy, Bernt, Friederich ind Lyse, elude vorgenant, vur unß ind unse erven, dat wy alsulchen brieff unsen vurfaderen, nemptlich Kathrynen, elige husfrowe Lodewichs van dem Putte, van dem vesten Gerde van Bodelswynge, erfschulten des hoves to Marthen, dair dit vurgenomte guet inhoirt, gegeven myt thyen marck, as to Dorpmonde genge ind geve, eyne hant andem vorgenanten guede to erlangen nae inhalde desselven brieffs, welkes brieves ind guedes vurbenomt, myt alle ind ytligen synen tobehoringen, woe vurgemeldet nicht dairvan utgescheiden, loven wy, Bernt, Frederich ind Lyse, elude vorgenant, vur unß, vur Everde des vurgenanten Berndes echte sone ind alle unse erven den vurgenanten pater ind convent, eren nakomelinge ind helder vurgenanten ind dysses genomten erffkoips to warnen ind rechte vullenkomen warenscop to doyen vur alle ansprake, die en myt rechte dair an gedayen mochten werden andem vurgenanten gude in deyle, off to male, soe ducke ind soe vake, woe ind wair en des van noit ind behoyfft is buten alle eren schaden op unse eygen kost ind arbeit, anxt ind eventure alle tyt to eren gesynnen off en des van noit ander brieve were to geven bether ind sulche verschryninge to doyn, dair sy indem rechte myt verwart ind waill bevestiget syn buthen ere vorder gevende guet off eyschen van unß, unsem sone vurgenant, unsen erven off yemantz van unsentwegen, dan allet sunder eren schaden; ind offt sake were, dat die vurgenanten pader, moider, convent ind helder vurgenant des as vurgenant to evygen bewyssligen schaden quemen, de van unß, unsen sone vurgenant, unser erven ind unser wegen her queme enygerwyse, den sullen ind moigen sy an unsen guedern, renthen, guiden ind gereyden guede, woe ind wair wy dat nu hebn, off hyr na krigen moigen to eren koire ind bequemsten ane verholen ind schadeloisß van maken dair wy unß geynerleye wyse, noch unse erven, off yemanntz van unseretwegen nicht enthegen, seggen noch doyen sullten alle dysse vurgenanten puncten ind eyn ytlich bisunder die loven wy vur unß ind unse erven wair, stede, vaste ind unverbrochligen to halden sunder all argelist ind drocherie alde ind nye vonde borchmanns, leenhmans ind borger recht ind allet dat diesen brieff, krencken off van vermacht maken ind wysen mochte id were an schryffte, an pergamente, an siegelen off woe men dat spreken off erdencken mochte gensligen utgescheiden en sollen wy noch unse erven, off yemantz, van unseretwegen nyet enthegen diesen brieff, off evige dysses brieffs inhalt nyet holden off doyn ind disser vurgenanten saken to gethuge ind in oirkunde der wairheit, soe hebn wy, Bernt van der Leyen, vor mynen son vurgenant, ind Frederich van dem Kaldenhove vur Lyse myn echte husfrowe vurgenant, vur unß ind unse erven unser beyder siegele an diesen brieff gehangen, des ich Lyse vurgenomt bekenne wairhafftich, alsoe to syn ind want dan alle erfftall ind guet van rechte geboirt to wynnen, to verliesen, to verkoipen ind to koipen to vertyen ind utganck to doyn vur synen rechten leenhern, dair id dynckmelich is. So syn wy, Bernt, Frederich ind Lyse vurgenant gekomen voir den vesten ind vromen Wenemer van Boidelswynge, erffschulten des hoves to Marthen, dair dit vorgenannte guet ind hoyve to hovesrechte inhoirt ind diesen erffkoip, oplatynge ind vertichnisse, utganck ind overgevynge des erstgenomten guetz ind brieves allet as recht is ind gelych vurgenanten gelovet ind gedayn ind en dairumb gebeden mede to bewilligen ind vur unß ind unse erven to gethuge der wairheit mede besegelen wille, des ich, Wenemer vurgenomt, bekenne wairhafftich soe ergangen ind vort durch sunderlichs bevelen des werdigen mynsß lieven heren, heren Anthonii abtz sent Ludgers stichtz to Werden vur my ind as voirgeroirt steyt geschiet is ind heb dairumb diese vurgenante erffkoip, oplatynge, uthganck ind vertichnisse mede bewilliget, bevestiget ind besegelt ind ich, Wenemer vurgenant, heb gegunt ind gunne vur my ind myne erven erffschulten des hoves to Marthen vermitz diesem brieve, dat die vurgenanten pater, moider ind semptlige susteren ere nakomelinge off helder dyss brieffs vurgenant dair anderen erstgenomten guede ind hoyven eyne hant bynnen jair ind dage myt thyen dorpmundsche mareken, alls dair genge und geve weren, soe vake die verstervet, wieder wynnen sullen, beheltlich dair andem vurgenanten guede dem hove to Marthen, synes echten ind van alders herkomen ind gewontlich is ind dat dat vurgenante convent eynen hovesmann dair voir sich stellen sullen, de to rynge ind to dynge des hoves vurgenant gae ind doe ind dysß to oirkunde ind vorder vestnisse aller ind ytliger vurgenanter saken, so heb ich umb bede, der vurgenomten parthie ind as eyn erffschulte des hoves to Marthen ind oich voir my ind mynen erven mynen siegell mede an diesen brieff gehangen. Datum anno domini dusent vierhundert sievendindnegentnich opsent Cecilien dagh virginis et matyris. |
Suche DWUD 
früher
|
später
Marienborn, Kloster 
zurück
