| Titel/Regest |
Vor Magister Johann von Galen, Pastor, dem Rentmeister Wessel Paschendal (Passchendaell), Wennemar Paschendal und Johann Springorum (Spryngorum) schließen Stine tom Putte auf der einen sowie Hermann, ein Sohn von Stines Bruder Gerd Puttman, und sein Vormund, der Bochumer Priester Wessel Bomeken auf der anderen Seite einen Vergleich, wegen 35 rheinischen Gulden, die Gert Puttman seiner Schwester Stine schuldig war. Es wird beschlossen, dass Hermann an Stine eine jährliche Rente von neun Scheffeln harten Schultkorns, halb Roggen und halb Gerste, aus neun Scheffelsaat vom Cruce acker, die Dietrich Vryman zu Altenbochum bewirtschaftet, am St. Martinstag (11.11.) zahlt. Er erhält ein Wiederkaufsrecht, das er an Cathedra Petri (22.02.) bzw. acht Tage davor oder danach wahrnehmen kann. Stine erhält ein Pfändungsrecht im Falle des Ausbleibens der Jahrrente und außerdem das Wiederkaufsrecht an Gert Puttmanns Erbland aus der Willekenshufe.
Wessel Paschendal kündigt sein Siegel an. |
| Text |
Idt is to wetten, als unwille und gebrecke gewesen is tusschen Stynen tom Putte, wedewen, an ene und Herman, Gert Puttemans seligen echten sone, und synen vormunderen, als myt namen herrn Wessell Bomeken prester, an dey anderen syden, antreffen viff und dertich rynsche gulden, dey vorgenante [a] Gert Putteman der vorgenanten Stynen, syner suster, schuldich was, darumb hey sey myt segell und breyven ter betalinge besorgen solde, wu dan dey gebrecke vor und na gelut hebn, also, dat darumb die erber und vorsichtigen meister Johan van Galen pastoir, Wessell Passchendaell rentemester, Wenemer Passchendaell und Johan Spryngorum burgermester to Boichem, und ander vrunde tusschen den vorgenanten partyen vruntlichen gekallet und also ter goitlicher schedynge gefunden und vestlich geslotten hebt, also, dat dey vorgenant Herman Putteman und syn erven der vorgenanten Stynen tom Putte offt eren rechten erven ut ene(n) stucke landes, myt namen ut negen scheppelseden, geheyten dey Cruce acker, so Diderich Vryman to Aldenboichem den nu ter tyt under hevet, alle yar und unv(er)yart ton ewigen dagen op sunte Mertyns dach nest komet und so vart an leveren und wol betalen sollen negen scheppel gudes harden claren schultkarns, halff rogge und halff gerste bochemscher maten in er wisse behalt in Boichem bis so lange, dat dey vorgenante Herman Putteman off syn erven dey vorgenanten negen scheppell hartz karns wedder gekofft hebn, welken wedderkoep sey alle yar don mogen op sunte Peters dach ad catedram acht dage dar vor offt na, unversumet, in dem dey vorgenante yar rente, und off dar wes ane vorsetten were, irsten wol betalt is, myt vyff und dertich rynschen gulden, eyn itlichen gulden to betalen myt teyn dortmundeschen schillingen. Und offt sake wer, dat Stynen vorgenant off eren erven geyn betalinge en gesche als vorgenant steet, so mogen sey den negen scheppel hartzkarns yaerenten und dey brake, en dar ane were, myt dem schaden ut dem vorgenannten Cruce acker und ut des vorgenanten Herman Puttemans erven und guden penden und dar vart mede umbgaen, als to Boichem gewontlich is. Vorder is bekallet, dat dey vorgenante Styne tom Putte und er erven alle yar op sunte Peters dach adcathedram wedderlosen mogen van dem vorgenanten Herman Puttemanne sodaen ervelant, als sey und er erven Gerde tom Putte, ere(n) broder vorgenant, und synen erven ut der Wilkens hove vorsat und verkofft hebt vor alsulken pennynck, als dar vor vorsat und verkofft is. Ok sollen dey vorgenante Styne tom Putte und ere erven den vorgenanten Herman tom Putte und syn erven by solken kopen und vorsetten na lude und inhalde solker segell und breyve, sey und er erven Gerde ton Putte und syn erven geven hebn, hanthaven und behalden sunder eren schaden und allet sunder argelist. Und hir mede sollen dey vorgenanten partyen to beyden syden leyfflichen und vruntlich gescheden syn und blyven, van der vorgenannten gebrecke wegen, und allet sunder argelist. Und want dese vorgenante schedinge, gelyk vorgerort, gescheen is, so heb ich, Wessell Passcheendaell rentemester vorgenant, umb bede willen beyder partye to getuchnisse der warheyt mynen segell an desen breyf gehangen, dey gegeven is in den yaren unses heren do men schreff dusent veyrhundert und LXXXVI op den nesten mandach na sunte Jurgens dagen ritters.
[a] Im Folgenden ist vorgenant immer die Auflösung von vorg + Kürzel |
Suche DWUD 
früher
|
später
Marienborn, Kloster 
zurück
