Lieder der Soester Fehde - nach der Handschrift A 1 (Stadtarchiv Soest)

	<115a>
	Wyll gy wetten wu dar geschach,
	wp eynen saterdage morgenn,
	Dat neuelde also sere,
	De Colschenn weren vor soist gerandt
	Bysschop Dyderyck was er herr.
	De wechter vp dem kuere sprack
	Dar uan so quam eyn klockenslach
	De colschen synt vns gekommen,
	Rucke wy tho enne in dat velt
	Des kryge wy alle fromenn.
	Johann de rode eyn junger mann,
	he sprack syne borger ann,
	nu volget my all wys synnenn,
	Ropet godt den heren ann,
	De colschen wylle wy schynden,
	Hau dar dorch voer du den heyt
	Chrystus moyt vns waldenn,
	De kortwyle was nicht lanck
	Dat mannyge glaue to stuken spranck,
	Se tuchten tho den swerdern,
	Sey slogen so mannygen harden slach
	De colschen tho der erdenn.
	Herr Dyderych van wytten eyn stolter degen,
	leue her vroste latet my leuen
	Johan van Schede eyn schutte.
	wy hadden id vp dat beste gedann,
	Jdt mochte vns io nicht gelucken
	Myn iuncker van buren eyn edelmann,
	sprack her Dyderjck van burscheyt an,
	Graue van wytkenstene,
	wy meynden wy stonde(n) by vnsen fru(n)den,
	nu sta wy hyr alleyne,
	Dar bleyff steuen van laer doyt,
	Myt allen synen knechtenn. <115b>
	Wulff van vfelen sych vmme sach,
	der geuangenn mer dan hundert war(en)
	he hadde syck hoch vor mettenn,
	he wolde der Soistschen velle faenn,
	De brock hadde he vorgettenn.
	Eyn gedycht wu kortlyckhusen
	gewunnen wort·
	Wyll gy horenn eyn nyge gedycht,
	wu idt de heren hebben vth gerycht,
	Al in dem Colschen landt,
	Vor kortlynckhusen synt se getogenn,
	Myt volcke mannyger handt.
	Cleue, Marcke, hogemoyt,
	paderborne, lyppe dat edell bloydt,
	de van soist mocht men dar schauwen,
	se stalten ere bussen vor dat huss.
	dat rede jck vp myn truwenn,
	Hunolt van hanxell dat vornam
	he was so duldych als eyn lam,
	vnnd de anderen guden gesellenn,
	de van soist reypen sey ann
	se beden enne rede tho vortellenn.
	Dat enn mochte en nicht boscheyn,
	de bussen mosten bey reymen teyen,
	vnnd schotten an de murenn.
	dat se reyt tho beyden sydenn,
	darvp mochten se nicht duren.
	Des morgens reypen se eynen andere(n) frede,
	dat men hörde doch ere rede,
	de van soist mosten dar komenn,
	vnnd horen dar eyn wort,
	des kregen se neynen fromenn,
	Her Dettmar kleppynck eyn borgermester gudt,
	Jasper torck was woll gemoyt, <116a>
	se reden to den herenn,
	vnnd geuen en dysse sacken to verstan
	alse ick jw werde vorklarenn.
	Se welt syck vns geuangen geuenn,
	Dat wy enne frysten lyff vnd leuenn,
	Vnnd stellen vns dat huiss tohanden,
	Vnnd nemen dat huss geryslyck jnn
	tho behoyff alle vnsen landenn,
	Dey heren weren des wolgemoyt
	se sprecken ja dat duncket vns syn gudt.
	wy wylt danhen rydenn
	vnnd nemen dat huss geryslyck jn,
	vnnd wylt des nicht vormydenn.
	Vor dat huys de heren quemen,
	wu snell se dat vp dem huse verneme(n)
	Sey quemen daraff getreden
	vnnd geuen syck geuangen
	jn der heren hant bj all solcken reden.
	Me moste enne frystenn leuen vnd lyff,
	Darvan was vorder geyn kyff,
	se nemen se dar geuangen,
	vnnd leydenn se myt syck in dat heer
	myt mannygenn groten verlangenn.
	Dus so wort dat huys gewunnenn
	Dat schach des morgens by hoyer sunnen
	vnnd hebbet dat inne myt ehrenn
	her Johann van hanxell reyt enwech
	alto denn hesseschen herenn.
	Vnnd well enne doyn dysse sake kundt
	vnnd maken dar eyn nye verbundt
	Eyn nyen walt wyll he hauwen
	Dar to hefft he syn huss vorloren.
	he mach woll eyn ander buwen,
	De vns dyssen rey vorsanck
	vryssche mey js he genandt, <116b>
	he hefft id woll vth gesungenn
	Ruden, warsten, Beleke vnd dat ganse lant
	synt an de handt gesprungenn.
	Eyn ander gedycht.
	Jck wyll dy seggen wat geschach
	vp gudenstach na margreden dach
	All in dem seluen jare
	Do man xlvi schryff
	Dat wyll jck dy apenbarenn
	Bysschop dyderyck kyck jntlandt
	he toch vor soist myt geweldyger handt
	myt mannyger hande were
	de van soist bereyden syck tho hant
	tho vote vnnd to perde,
	Se togen tho enne jn dat veldt,
	dar he myt synen banner heldt,
	se schotten dar manygen bussen clodt,
	den eynen lam, den anderen doyt,
	se konden des nicht gekeren
	de menne leden grote noydt
	all vp den ackermerenn,
	Se werden enne dat soistsche velt,
	se jageden enne myt groter gewalt
	van dyssen sydt der sledde,
	myt bogen vnnd bussen des gelyck
	vordeynden prys vnnd ehre darmede.
	De furste van Cleue hochgeborenn,
	Eyntboyt den papen hochbeschorenn,
	wat he dartho reyde
	he wolde eme strydes vorplegenn,
	vor den plas behelde,
	Se sprecken alle vth eynen munde,
	et were eyne vngeluckyge stunde, <117a>
	Dat he des nicht endede,
	Mallynckrot den gaff vnt gode,
	der duuel hefft ene vns genomen.
	Clamer bussche heth de mann,
	de de Colschen wecken kan,
	he wecket se myt geschrye,
	de van soist hebben noch wall karnn,
	all dede den papen noch so tarne,
	De bysschop gelyckede eynen wulue vnd toch jnt holt <in HS: holt u.d.Z. ergänzt>
	syn sorge weren so mannychwalt,
	he leyde sych dar betunenn,
	e(m)me was leyde vor gewalte,
	dar genget an eyn rumenn.
	Se reypenn all locht em na,
	he moyt enwech ha· ha· ha,
	he hefft hyr wall gewesenn,
	de eere de em vorgescha,
	de is em all eyntresenn,
	Se togen tho werle jn dat slote,
	se weren so mode, se weren so math
	se hedden so gerne gettenn,
	dar gaff men enne nauwe half sayth
	des hadde enne wall vordrottenn.
	Bysschop van collen, hyldensem vnd magnus
	warvmme bleue gy nicht to huis,
	vnnd gengen to collen tho core,
	gy spelet so sere vp jw vorluys
	vy alden grysen dorenn.
	Fruchtet gy nicht juw heren torne,
	dardorch gi mogen werden vorloren,
	vnnd de jw heuet geschapenn
	nicht to rouen, brenen vnnd kerckenschynden <in HS: den u.d. Z. ergänzt>
	schamet jw alden grysen papen. <117b>
	De vns dydt nye leycken sanck,
	eyn ruter knecht was he genandt,
	he heuet idt wall gesungenn,
	de colschen hebben e(m)me leydt gedan
	dyt leyt wyll he enne doen sendenn.
	Vann dem Belege
	vor Soist.
	Uuer, Blyxen van hagelslach,
	krich vnnd orllych groydt,
	dat brenget de welt in vngemack,
	de chrysten lydenn noydt
	dat gode selues geyne(n) frede mochte haynn
	dat merkede me by den salschen joeden,
	de gode vnsen heren vorraden dedenn.
	Am lsten van dyssen sommer tydt,
	de wort sych eyn reydt bestaynn,
	van collschen, Bemen vnnd sassen,
	darto de Messcheschen herenn,
	de Blomberch wort vth gebrandt,
	dar schach jamer grodt,
	harn, vnnd Lemegou gengen se ann,
	de lyppe leyt eynen harden stoydt
	De eyne borger tho dem anderen sprack
	vns deyt woll hulpe noyt,
	wy seyn so mannygen dusent mann,
	se staen na vnsen doyt,
	Nu help vns chrystus vnd syn engele koer
	dat se vnsen vyanden sturenn,
	so behalde wy dyssenn plas. <118a>
	Se schottenn de harten muren entwe,
	De thorne vellen vmme
	Dar sach man schon ruter spell
	vor der lyppe heff syck vp eyn stelenberch
	Noch grayer dan eyn jys
	se stalten syck an wu eyn wunderwerck,
	se wolden vordeynen den prys.
	Sey leytenn vor der lypp trumpetten slaen
	Dar hoff sych eyn grodt heer,
	wall vp gy heren junck vnnd alt.
	Na soist js vnse beger,
	dar wyl wy vorteren berch vnnd holt,
	kondt wy soyst gewynnen
	de lyppe queme seluen ann,
	Jck harde eyn <in HS: noch ein 'eyn'? - schwer lesbar> fogelken syngenn,
	dat vp dem kurhus sanck,
	Jck sach eyn schar vp dryngenn,
	vell blancker dan eyn glas,
	dat syt de cleueschen ruter stolt,
	de wylt vns beschudden den plas,
	de syt vns truwe vnnd holt.
	Sey stalten sych reyslych vp de wer
	des geuen en de heren danck,
	se schotten myt bussen jn dat heer,
	de bemer worden kranck,
	de graue van sterneberch reyp ouer luyt
	wat boser ruter synt de cleueschenn,
	se drucken vns vp de huyt. <118b>
	Myn her van Collenn vorantworde dat
	se hebben myr leyd gedaen,
	se nement my sunte peters stadt
	Jch byn syn capellann,
	se rouet myn stede, se bernet myn landt
	des moyt ich eyn ruter sterue(n) ahne myn danck. <in HS: danck u.d.Z. ergänzt>
	Se leyten en eyn beer bruwen,
	van kalcke vnnd ock van melle
	dat schenkeden en de frouwen.
	se spellden en vp de kellenn
	se geuenn er leuenn v(m)me eyn kapp
	ja pyle duchten enn vyolien synn,
	se helden dar jo nicht aff
	Hedden de cleueschen ruter gedann
	Soist wer gewunnen,
	So harde was se bestann,
	Godt gaff dat se myt schanden mosten aff gan. <in HS: aff gan u.d.Z. ergänzt>